पुण्यातील मध्यवर्ती भागातील अरुंद रस्त्यांवर सार्वजनिक वाहतूक सक्षम करण्यासोबतच, शहरातील मेट्रोसेवा अधिक प्रभावी करण्यासाठी पीएमपीने केंद्र शासनाकडे ५०० मिनी बसची मागणी केली आहे. ७ मीटर लांबीच्या असणाऱ्या या बस ताफ्यात दाखल झाल्यास पुणेकरांचा प्रवास अधिक सुखकर होण्यास मदत होणार आहे. पुणे शहराच्या मध्यवर्ती भागात पीएमपीला मोठा फायदा होईल.
पुणे शहरातील मध्यवर्ती आणि जुन्या भागांमधील रस्ते अत्यंत अरुंद आहेत. त्यामुळे मोठ्या बस या भागातून चालवताना पीएमपी प्रशासनाला आणि चालकांना मोठ्या कसरतीचा सामना करावा लागतो. परिणामी, वाहतूक कोंडी वाढते आणि नागरिकांना सार्वजनिक वाहतुकीचा पुरेसा लाभ मिळत नाही. या समस्येवर मात करण्यासाठी ७ मीटरच्या छोट्या मिनी बस अत्यंत उपयुक्त ठरणार आहेत.
या मिनी बसचा मुख्य वापर दोन प्रमुख कारणांसाठी केला जाणार आहे. मेट्रोस्थानकांपर्यंत प्रवाशांना पोहोचवण्यासाठी आणि मेट्रोतून उतरल्यानंतर पुढील प्रवासासाठी या बस फिडर सेवा म्हणून चालवल्या जातील. तसेच पेठ भाग, अरुंद रस्ते आणि अंतर्गत गल्लीबोळांमध्ये या बस सहजपणे फिरू शकतील, त्यामुळे मध्यवर्ती भागातील नागरिकांना थेट सार्वजनिक वाहतुकीचा पर्याय उपलब्ध होईल.
या मागणीला मंजुरी मिळून बस ताफ्यात समाविष्ट झाल्यास, पीएमपीची एकूण प्रवासी वाहन क्षमता वाढणार आहे. यामुळे शहरातील वाहतूक कोंडी कमी होण्यास मदत होईलच, शिवाय मध्यवर्ती पुण्यातील नागरिक आणि मेट्रो प्रवाशांचा वेळ आणि पैसा दोन्ही वाचेल, असा विश्वास पीएमपी प्रशासनाकडून व्यक्त केला जात आहे.
